ДРАМА ВО ГЕРМАНИЈА: Сомнителен предмет на пруга целосно го блокираше железничкиот сообраќај!

Драматичната ситуација започнала откако железнички техничар го забележал сомнителниот објект скриен меѓу праговите на пругата. Предметот е лоциран на самиот влез во железничката станица во градот Тројхтлинген, кој е сместен јужно од Нирнберг. По откривањето, специјализирани тимови на сојузната полиција веднаш излегле на терен за да ја утврдат реалната опасност.

Рендгенски снимки и евакуација на населението

Од Полициската управа на Средна Франконија информираат дека објектот веќе е снимен со рендгенски апарати, но деталните анализи сè уште се во тек. Заради заштита и максимална безбедност на граѓаните, полицијата и надлежните служби веднаш евакуирале повеќе згради кои се наоѓаат во непосредна близина на железничката линија.

„Специјалците напоменуваат дека можноста за присуство на експлозив сè уште не е целосно исклучена и дека се потребни дополнителни вештачења пред да се донесе конечна одлука за отстранување на блокадата.“

Алтернативен превоз и пренасочени возови

Полицијата потврди дека сообраќајната блокада останува на сила и дека засега нема прецизни проценки кога повторно ќе се нормализира движењето по пругите. Патничкиот превоз на локалните линии привремено се одвива со автобуси и такси-возила, додека возовите на долги релации се пренасочуваат по заобиколни рути.

Градот Тројхтлинген претставува важен железнички јазол меѓу Нирнберг и Инголштад, но надлежните смируваат дека брзата пруга која ги поврзува Минхен и Нирнберг минува поисточно и сообраќа нормално, без никакви прекини.