Инцидент во Црното Море: Два брода нападнати од дронови кај бугарскиот брег, еден потона

Еден брод потона, спасувачките екипи на терен

Ова е втор ваков сериозен инцидент во регионот во изминатата седмица. Според официјалните податоци, нападите се случиле на две блиски локации:

• „Челзи 3“ (Chelsea 3): Брод во сопственост на украинска компанија кој пловел под знамето на Малта, бил погоден од три дрона околу 01:30 часот по полноќ, на околу 33 километри (18 наутички милји) од бугарскиот брег. Целиот екипаж од 15 членови (седум Украинци и осум Азербејџанци) е спасен, а петмина добиле медицинска помош без сериозни повреди.
• „Азов Конкорд“ (Azov Concord): Бродот бил погоден и потонал на приближно 17 наутички милји источно од Крапец. Според првичните информации презентирани на вонредниот Совет за безбедност, досега е спасен еден член на екипажот.

Дипломатска реакција и контакт со НАТО

Бугарскиот премиер Румен Радев ги оцени нападите како апсолутно неприфатливи, нагласувајќи дека тие претставуваат директна закана за безбедноста во близина на територијалните води на земја-членка на Алијансата.

Иако нагласи дека засега нема директни материјални докази за сторителите, премиерот подвлече дека исходот на терен ѝ оди во прилог на Москва. Поради ова, најавено е повикување на руската амбасадорка Елеонора Митрофанова на разговор во Министерството за надворешни работи.

„Ова е целосно неприфатливо – уште еден напад во непосредна близина на бугарските територијални води. Имаме намера директно да го отвориме ова прашање со генералниот секретар на НАТО, Марк Руте“, порача Радев.

За инцидентите веќе се официјално известени постојаните претставништва на Бугарија во НАТО и во Европската Унија, со оглед на зголемениот ризик од хибридни дејствија и безбедносни закани за поморскиот сообраќај во Црното Море.