Мицкоски пред реизбор во Кавадарци: „Ова ќе биде мојот последен мандат на чело на ВМРО-ДПМНЕ“

ВМРО-ДПМНЕ го одржува 18-тиот Конгрес во Кавадарци: Мицкоски е единствен кандидат за лидер, се носи „Стратегија 2030“

Денеска во Кавадарци се одржува 18-тиот редовен Конгрес на владејачката партија ВМРО-ДПМНЕ, на кој се очекува реизбор на Христијан Мицкоски за претседател, со оглед на тоа што тој е единствен кандидат за функцијата. Под мотото „Визија што гради држава – За генерацијата што доаѓа 2030“, на настанот присуствуваат околу 2.600 лица, од кои над 850 се делегати со право на глас. Главна точка, покрај изборот на раководство, е усвојувањето на документот „Стратегија Македонија 2030“, кој ги дефинира столбовите на идната државна политика.

Последен мандат за Мицкоски и финансиска консолидација

Мицкоски најави дека доколку биде избран, ова ќе биде неговиот трет и последен мандат на чело на партијата, почитувајќи го Статутот кој го ограничува претседателувањето. Тој децидно изјави дека нема намера да поддржи промени за продолжување на мандатите. Дополнително, лидерот на ВМРО-ДПМНЕ се пофали со финансиската состојба на партијата, истакнувајќи дека за првпат немаат долгови кон банки, за разлика од тешката ситуација во 2018 година.