Муцунски во Брисел: НАТО крои стратегија за Украина и одговор на „малигните влијанија“

Министерот Муцунски на маса со НАТО сојузниците во Брисел: Колективната одбрана и поддршката за Украина во фокусот

На покана на Генералниот секретар Марк Руте, министерот за надворешни работи и надворешна трговија, Тимчо Муцунски, денеска учествува на клучниот состанок на министрите за надворешни работи на НАТО во Брисел. Оваа средба е стратешка можност за размена на ставови околу имплементацијата на одлуките од Самитот во Хаг, кои се од суштинско значење за иднината на Алијансата. Во центарот на вниманието ќе биде напредокот во зајакнувањето на индивидуалните одбранбени капацитети, со цел да се гарантира ефективна колективна безбедност во време на зголемени геополитички тензии.

Одговор на „малигните влијанија“ и средба со врвот на САД

Министрите ќе дискутираат за заедничките напори за континуирана поддршка на Украина, како и за стратегиите за справување со дестабилизирачките активности на „малигните актери“ кои се обидуваат да ја нарушат глобалната безбедносна архитектура. На маргините на самитот, Муцунски ќе има густа агенда на билатерални средби, меѓу кои се издвојува средбата со шефот на американската делегација, заменик-државниот секретар Кристофер Ландау. Дополнително, од особено значење за Македонија е најавеното учество на тематски состанок посветен на развојот и безбедноста на Коридорот 8.