НЕЈАСНА СУДБИНА: Иранскиот министер тврди дека Хамнеи е жив

По ракетните удари врз комплексот на врховниот ајатолах Али Хамнеи во Техеран, иранскиот министер за надворешни работи Абас Арагчи изјави дека тој е жив – но без целосна сигурност

Во интервју за NBC News, Арагчи рече: „Колку што знам, Хамнеи е сè уште жив“, додавајќи дека повеќето високи функционери се безбедни. Ваквата формулација веднаш предизвика реакции во меѓународната јавност, со оглед на чувствителноста на ситуацијата.

Исчезнување од јавноста

Хамнеи не се појавил јавно во последните денови, а нема официјална потврда дали се наоѓал во резиденцијата во моментот на нападот. Иранските власти претходно информираа дека во време на зголемени безбедносни ризици, тој бил преместуван на безбедни локации.

Извештаи за цивилни жртви

Иранските медиуми јавуваат за жртви по неколку удари во различни делови од земјата, вклучително и врз цивилни објекти. Дел од бројките засега не се независно потврдени. Ситуацијата на терен останува динамична и исполнета со неизвесност.