ОД ТЕТОВО ДО БЛАТО: Затворања и забрани поради посетата на Бегај

Тетово, Гостивар и Дебар денеска се под посебен сообраќаен режим поради престојот на претседателот на Албанија, Бајрам Бегај

Во Тетово се воведени привремени безбедносни мерки, забрана за паркирање и ограничувања на повеќе улици во централното подрачје. Од Општината апелираат возилата да не се оставаат на булеварите „Маршал Тито“ и „Благоја Тоска“, како и на повеќе споредни улици, со предупредување дека неправилно паркираните возила ќе бидат отстранети.

Полициско обезбедување и затворања

СВР Тетово најави засилен ангажман на полициски службеници кои ќе регулираат сообраќај и ќе обезбедуваат непречено движење на делегацијата. Во Дебар, од 12 до 19 часот ќе има повремено затворање на регионалните патишта Р-1202 и Р-1201, како и на повеќе градски улици.

Агенда на посетата

Според најавите, Бегај ќе ги посети Општина Тетово, ООУ „Лирија“, Шарената џамија и Арабати Баба Теќе, а престојот ќе го заокружи во Дебар, од каде преку граничниот премин Блато ќе замине за Албанија. Надлежните апелираат граѓаните да ги почитуваат упатствата на полицијата со цел безбедно и непречено одвивање на активностите.