По 76 мртви во протестите, Непал ја отвора најтешката пресметка

Непал влезе во нова политичка ера со апсењето на поранешниот премиер КП Шарма Оли, само еден ден откако новиот лидер Балендра Шах и официјално ја презеде власта во земјата.

Апсењето доаѓа по драматичниот пресврт што го потресе Непал по крвавите младински протести против корупцијата, кои во септември минатата година ја разнишаа државата до темел. Гневот тогаш избувна откако владата воведе забрана за неколку социјални мрежи, а незадоволството брзо се претвори во масовен бунт против корупцијата, непотизмот и политичката ароганција.

Сега, неколку месеци подоцна, истиот тој бран што ја урна старата власт почнува да ја испорачува и првата голема политичка сметка. Заедно со Оли е приведен и поранешниот министер за внатрешни работи Рамеш Лехак, додека новата власт испраќа јасна порака дека периодот на заштитени политички имиња е завршен.

Протестите што ја сменија земјата

Септемвриските немири не беа обичен политички судир. Тоа беше експлозија на младински бес во земја каде долгогодишното разочарување од елитите конечно ја проби границата. Илјадници млади излегоа на улиците барајќи крај на корупцијата и старите мрежи на моќ, а протестите брзо се претворија во најтешка внатрешна криза во поновата историја на земјата.

Кога безбедносниот апарат одговори со сила, последиците беа страшни. Загинаа најмалку 76 луѓе, а илјадници беа повредени. Токму тој момент ја скрши политичката тежина на Оли и го оттурна кон оставка, по што следуваше распуштање на парламентот и нови избори.

Во очите на голем дел од јавноста, тој септември не беше само протест. Тоа беше момент на пресметка меѓу една генерација што бара промена и систем што тврдоглаво се обидуваше да опстане по старо.

Шах ја презеде власта, правдата почнува од врвот

Во таква атмосфера, победата на Балендра Шах, раперот што стана политичар, доби многу пошироко значење од обична изборна смена. Таа беше прочитана како казна за старите партии и како обид земјата да се оттурне од кругот на повторувачки кризи, договори зад затворени врати и неказнивост.

Новата власт очигледно сака уште на стартот да покаже сила. Пораката што ја испрати министерот за внатрешни работи, дека никој не е над законот, не е само политички слоган. Тоа е директен удар врз системот што со години успеваше да ги преживее и скандалите и јавниот бес.

Но вистинскиот тест допрва доаѓа. Ако ова апсење остане само симболичен почеток, без јасна и темелна правна постапка, тогаш надежта за нов правец лесно може повторно да се претвори во разочарување. Ако, пак, процесот оди до крај, Непал би можел да влезе во редок момент кога политичката промена не завршува само со нови лица, туку почнува да носи и вистинска одговорност.