Трамп отвора нов фронт: сака крај на „породилниот туризам“ во САД

Американскиот претседател Доналд Трамп повторно се обидува да го ограничи автоматското стекнување американско државјанство по раѓање, насочувајќи ги новите мерки кон таканаречениот „породилен туризам“ или „birth tourism“.

Според новите мерки, новороденчињата чии мајки патуваат во Соединетите Американски Држави исклучиво со намера таму да се породат, не би требало автоматски да добиваат американско државјанство.

Трамп сака да стави крај на „породилниот туризам“

Со потпишаниот декрет администрацијата на Трамп сака да ја спречи практиката бремени жени да влегуваат во САД со цел нивните деца, по раѓањето на американска територија, да стекнат државјанство.

Станува збор за нов обид на претседателот да го стесни толкувањето на долгогодишното правило за државјанство по раѓање.

Но, мерката речиси сигурно повторно ќе отвори сериозна правна битка. Се очекуваат нови тужби и судски оспорувања на претседателскиот декрет.

Нови правила и за државјанство добиено со измама

Трамп потпишал и втор декрет со кој на американските власти им се дава можност да поведат постапка за одземање државјанство од лица за кои ќе биде утврдено дека го стекнале врз основа на лажни или измамнички информации.

Новите мерки ги опфаќаат и децата на дипломати, како и децата на лица вработени во странски влади.

Прашањето за државјанството повторно пред судовите?

Трамп и претходно се обиде да го ограничи автоматското стекнување државјанство за деца родени во САД, но прашањето заврши пред американските судови.

Според досегашното толкување, децата родени на американска територија продолжуваат да имаат право на американско државјанство, вклучително и кога нивните родители престојуваат во земјата нелегално или само привремено.

Најновите декрети покажуваат дека Трамп не се откажува од промената на оваа практика, а следната фаза од спорот најверојатно повторно ќе се води во судниците.