Трамп порача дека Куба е следна, Хавана влезе во нова зона на страв

Трамп повторно ја крена тензијата во регионот, откако од Флорида порача дека „Куба е следна“, отворајќи нов бран прашања за тоа дали Вашингтон само испраќа политичка закана или навистина подготвува нов силен притисок врз Хавана.

Изјавата доаѓа во момент кога односите меѓу САД и Куба се веќе затегнати до крајност. Американскиот претседател не објасни што точно мисли под таа порака, но контекстот беше доволно силен. Тој директно се повика на неодамнешните американски акции во Венецуела и Иран, а потоа рече дека и Куба е следна.

Во ваква атмосфера, дури и нејасна реченица може да има тежина на отворена закана. Особено кога доаѓа од човек што претходно веќе зборуваше за можност од „пријателско преземање“ на островот, но остави простор и за многу потврда варијанта.

Хавана разговара, но не попушта

Во исто време, кубанското раководство веќе потврди дека постојат разговори со Вашингтон. Но од Хавана јасно порачаа дека тие контакти не значат подготвеност за политичка капитулација. Кубанската власт тврди дека ниту мандатот на претседателот Мигел Дијас-Канел, ниту политичкиот систем на земјата не се тема за преговарање.

Тоа значи дека и покрај притисокот, Куба се обидува да испрати порака дека преговорите не се знак на слабост, туку обид да се избегне уште подлабока криза или можен опасен судир. Но колку долго таквата позиција ќе може да се одржи, останува отворено прашање.

Особено затоа што американската реторика не звучи како класична дипломатија. Таа сè повеќе личи на комбинација од притисок, психолошка игра и отворено тестирање на нервите на кубанското раководство.

Куба е во тешка енергетска криза

Позадината на целата приказна е длабоката економска и енергетска криза на островот. Куба остана сериозно погодена поради прекините и намалувањето на испораките на нафта од Венецуела, што директно удри врз производството на струја, транспортот и секојдневниот живот.

Без стабилно снабдување со гориво, кризата станува не само економска, туку и политичка. Токму затоа секој нов американски потег се доживува како можен обид да се притисне системот до точка на пукање.

Па затоа реченицата „Куба е следна“ не звучи како случајна шега. Таа доаѓа во момент кога островот веќе е притиснат од недостиг на енергија, тивки преговори и силна неизвесност за тоа што ќе направи Вашингтон понатаму.

Засега нема официјално објавен конкретен американски план за воена акција. Но пораката што ја испрати Трамп е доволно силна за повторно да ја стави Куба во центарот на една многу чувствителна геополитичка игра.