Трамп ги „замрзна“ санкциите кон Русија: Дипломатијата доби шанса пред економската војна!

САД привремено го суспендираа новиот пакет санкции против Русија, давајќи ѝ предност на дипломатијата во пресрет на посетата на Стив Виткоф на Москва.

Според „Киев пост“, законот е повлечен од агендата на Сенатот сè додека главниот преговарач на претседателот Доналд Трамп не оствари средба со рускиот врв следната недела. Овој потег во Вашингтон се толкува како јасен сигнал дека приоритет на Белата куќа во моментов е дипломатскиот канал, наместо економска ескалација. Законот што е ставен на чекање предвидуваше драстични тарифи до 500% за увоз од трети земји (како Кина и Индија) кои продолжуваат да купуваат руска енергија.

Путин збунет: „Искрено, не разбирам што се случува“

Одлуката за одложување доаѓа откако Владимир Путин во Бишкек изрази изненадување поради претходните санкции кон две руски нафтени компании, потсетувајќи дека на самитот во Алјаска било постигнато „разбирање“ за решавање на конфликтот. „Ви велам искрено, дури и не разбирам што се случува“, изјави Путин. Како сигнал за подготвеност за дијалог, рускиот претседател веќе назначи официјална преговарачка делегација за украинското прашање.