Левица удри по Мицкоски: „Носиш џемпери од 2.000 евра, а барањата на сиромашните ти се ’политичка агенда‘“

Политичката дебата околу зголемувањето на минималната плата доби остра, лична и идеолошка димензија откако опозициската партија Левица жестоко реагираше на изјавите на премиерот Христијан Мицкоски.

Додека синдикатите бараат усогласување на платите со трошоците за живот, премиерот ги отфрли овие барања како „политичка агенда“. Оваа изјава предизвика бурна реакција од партијата на Димитар Апасиев, која го обвини претседателот на Владата за „класна ароганција“, правејќи директна споредба помеѓу неговиот личен луксуз и сиромаштијата на македонскиот работник.

„Цинизам е да зборуваш за нереални плати облечен во џемпер од 2.000 евра“

Во своето соопштение, Левица не штеди зборови за да го опише она што го гледаат како лицемерие на извршната власт. Тие го искористија моментот да укажат на скапата гардероба на премиерот, тема која често е предмет на коментари во јавноста, како симбол на отуѓеноста на елитите.

„Кога носител на највисоката извршна функција, човек кој јавно и бесрамно демонстрира луксуз и носи џемпери од по 2.000 евра, држи лекции за нереалноста на барањата за повисоки примања на работниците, тоа е врв на цинизам. Тоа е отворена демонстрација на класна ароганција и целосна отуѓеност од реалноста во која живее мнозинството граѓани“, обвинуваат од Левица.

Според нив, обидот на власта да ги претстави синдикалните барања како партиски интриги е директен удар врз уставното право на здружување и борба за егзистенција.

Економска реалност: „Трета економска сила“ или земја на евтина работна сила?

Левица ги спротивстави владините ПР-наративи со суровите економски показатели. Додека Владата се фали со економски успех и се прогласува за „трета економска сила во Европа“ според одредени параметри за раст, реалноста на терен е поинаква.

Партијата потсетува на следните алармантни податоци:
* Македонија ја има најниската минимална плата во регионот.
* Дури 73 отсто од вработените земаат плата пониска од просечната.
* Секој трет работник преживува со помалку од 30.000 денари месечно.
* Минималната синдикална кошница за четиричлено семејство надминува 66.000 денари.

„Во услови на континуирана инфлација, куповната моќ постојано се намалува. Тврдењата за економски просперитет се пропагандна фикција што грубо ја навредува секоја фамилија која пресметува дали ќе го помине месецот“, се вели во реакцијата.

ВМРО-ДПМНЕ помеѓу увоз на работници и иселување на домашните

Покрај критиките за платите, Левица отвори и прашање за демографската катастрофа и стратегиите на пазарот на труд. Тие предупредуваат дека додека над 50.000 граѓани работат во странство барајќи спас од сиромаштијата, Владата најавува увоз на странска работна сила наместо да ги подобри условите за домашните работници.

„Политичките потези на ВМРО-ДПМНЕ се јасно класно одбележани. Приоритет имаат интересите на крупниот капитал и нивниот луксуз, а не трудот. Тоа е длабоко десничарска, антисоцијална политика“, заклучуваат од Левица, порачувајќи дека минималната плата не е политика, туку прашање на човечко достоинство.