Франција повторно под оган: Подготвена евакуација за речиси 200.000 луѓе

Нови шумски пожари повторно претставуваат сериозна закана во југозападна Франција, каде властите се подготвени за можна евакуација на речиси 200.000 жители доколку ситуацијата дополнително се влоши.

Иако кон крајот на минатата недела изгледаше дека огнената стихија е ставена под контрола, екстремните температури и силниот ветер повторно создадоа проблеми во текот на викендот.

Пожарите повторно се разгоруваат

Еден од пожарите што повторно се активирал е во општината Сен-Жан-д’Илак, каде на терен се испратени значителни противпожарни сили.

Шефот на локалната противпожарна служба, Томас Мимијак, изјави дека екипите се фокусирани не само на гаснењето на шумскиот пожар, туку и на заштита на станбените објекти.

„Поради временските услови, ангажиравме значителни сили, кои се фокусирани на гаснење на шумскиот пожар, но и на превентивна заштита на куќите“, изјави Мимијак.

Јужна Европа со недели се бори со огнената стихија

Пожарите не се проблем само за Франција. Во изминатите недели пожарникарите и во Шпанија се соочуваат со сериозни пожари, поттикнати од високите температури и сушните услови.

Огнените стихии веќе уништија големи површини вегетација, додека службите за итни случаи продолжуваат да ги следат ризичните подрачја и да ги подготвуваат плановите за евакуација доколку тоа стане неопходно.