ВМРО-ДПМНЕ обвинува: Заев и Филипче преку Еуростандард банка испрале 110 милиони евра од Венецуела

Мрежа на трансакции: Од Венецуела преку Белорусија до Србија

Според наводите на ВМРО-ДПМНЕ, првата транша од овие сомнителни трансакции изнесувала 110 милиони евра, додека целокупниот износ кој требало да помине преку Еуростандард банка достигнувал неверојатни 1,6 милијарди евра. Во шемата се споменува и македонска фирма која купувала вештачко ѓубриво од компанија во Белорусија, по што средствата биле трансферирани на сметка во Србија каде подоцна биле замрзнати од тамошното обвинителство.

Од партијата обвинуваат дека токму од Владата на СДС, странски олигарси кои се гонети за криминал во матичните земји, во Македонија добивале пасоши, тендери и урбанистички планови кроени по нивна мерка.

Сомнителни милионски кредити за блиски фирми

Покрај меѓународните трансакции, ВМРО-ДПМНЕ отвори прашања и за домашното кредитирање, посочувајќи дека фирми блиски до семејството Заеви и нивни деловни партнери – како „Сара инженеринг“, „Глобал медија груп“ и „Тритерол“ – земале милионски кредити од Еуростандард банка кои потоа никогаш не ги вратиле.

Од партијата порачуваат дека политичката моќ не смее да служи за заштита на криминални бизнис-интереси и најавуваат одговорност за, како што велат, „изворот на криминалот и корупцијата“.

„Единствено во периодот на власт на СДС, Зоран Заев и Венко Филипче преку Еуростандард банка, во Македонија се ‘испраа’ пари дојдени од Венецуела… вкупниот износ на средствата што требало да бидат префрлени достигнувал неверојатни 1,6 милијарди евра…“