СДСМ со брутален напад за роденденот на ЗНАМ: „Една љубов – тендерите, Максо ја продаде Македонија за плац на Лидл!“

Кино-проекција на едно предавство

Додека ЗНАМ својот двогодишен отчет го прави во кино-сала под мотото „Две години работа. Две години резултати“, од СДСМ остро возвраќаат дека единствената вистинска парола е: „Една љубов – тендери“. Според нив, филмот што денеска се прикажува е всушност приказна за тоа како се предаваат партијата и гласачите за функции и личен профит.

Од „Бихаќка“ тврдат дека ЗНАМ никогаш не бил автентично движење, туку однапред смислен проект на Христијан Мицкоски со цел да се урне СДСМ одвнатре. Според нивното тврдење, луѓето кои ветувале реформи, преку ноќ станале дел од она што тие го нарекуваат „организирана криминална група на ВМРО“.

„Патриоти“ со бугарски фирми и плацеви за Лидл

Обвинувањата одат дотаму што отворено се прозива Максим Димитриевски за сомнителни зделки, вклучувајќи ги тендерите во општината и Пошта, како и фамозниот плац за Лидл. Од СДСМ иронично забележуваат дека со оглед на тоа што Димитриевски наводно има фирма во Бугарија, комотно може да се претстави и како странски инвеститор.

„Нека објаснат колку чини столчето. Нека објаснат зошто ’патриотите’ имаат бугарски пасоши и фирми. ЗНАМ не е движење, туку сателит на Мицкоски. Следниот настан нека го прават заедно во Белата палата – филмот веќе го знаеме!“

Најавената турнеја на ЗНАМ низ 14 градови е оценета како обид за перење на совеста пред граѓаните кои, според СДСМ, се држат како заложници. Од опозициската партија порачуваат дека доаѓа време кога за предавството на државата ќе се одговара пред суд, а не пред филмско платно.