Четири часа преговори во Флорида: Рубио и Умеров бараат формула за мир, но „има уште работа“

Четиричасовен маратон во Флорида: САД и Украина ги „пеглаат“ деталите за мир, следна станица е Москва

Американскиот државен секретар Марко Рубио ги оцени како „продуктивни и корисни“ разговорите со украинската делегација предводена од Рустем Умеров, одржани во Флорида. На масата седеа и специјалниот пратеник Стив Виткоф и зетот на Доналд Трамп, Џеред Кушнер. Иако е постигнат напредок во дефинирањето на условите кои би обезбедиле „долгорочен просперитет и суверенитет“ за Украина, Рубио предупреди дека „има уште работа што треба да се направи“ пред да се постигне конечен договор.

Умеров го замени Јермак, најтешкото прашање се териториите

Значаен момент е што украинскиот тим го предводеше Рустем Умеров, кој ја презеде улогата на главен преговарач по оставката на Андриј Јермак поради корупциски скандал. Додека Трамп е оптимист дека „има добри шанси за договор“, изворите велат дека разговорите не биле лесни, особено околу клучното нерешено прашање – судбината на анектираните и окупираните територии. Дипломатската офанзива продолжува неделава, кога Виткоф и Кушнер ќе отпатуваат во Москва за да ги пренесат позициите пред рускиот врв.